Encontro Irmandiño

Mudamonos ao seguinte enderezo

http://www.encontroirmandinho.org

O Encontro Irmandiño, que celebrou o 28 de xuño a súa II Asemblea Nacional, acordou formalizarse no seo do BNG como corrente organizada e pedir á formación nacionalista que "exerza as competencias estatutarias até o límite" sobre todo en sectores produtivos estratéxicos, "sen deixarse arrastrar pola submisión reverencial do PSOE ás políticas da Unión Europea". (máis...)

A reunión prolongouse durante máis de tres horas, durante as que os presentes debateron as enmendas apresentadas, propostas de regulación, documentos e os Principios éticos e ideolóxicos e os Principios Organizátivos e Estatutos sobre os que se estrutura este colectivo.
Tras a 'Asemblea constituinte', a Coordenadora do Encontro Irmandiño queda integrada por Xosé Manuel Beiras, Cristina Amor, Luis Eyré, Mónica Díaz, Mario López Rico, Iolanda Pérez, Ramón Mouriño, Luisa Sabio, Xosé Manuel Taboada e Concha Trigo. Aos que se lles unirán as/os responsabeis elexidos nas respectivas asembleas comarcais e serán os encargados de emprender a organización dunha Asamblea Nacional do Encontro Irmandiño para configurar os seus órganos de dirección.

Frear o mito de Sísifo
Nacen para frear a que, segundo cren, está a ser unha caída do proxecto do BNG. Así o manifestou trala elección da coordenadora Xosé Manuel Beiras, ao asegurar que o mito de Sísifo pode aplicarse á historia do nacionalismo galego posto que "os que toman o relevo tiveron que comezar desde máis abaixo de onde empezaron os anteriores".

Beiras engadiu que no momento actual "cabe a dúbida de se estaremos a piques de padecer unha nova frustración que leve a que a pedra caia da cima, aínda que a medio camiño alguén a pare". Así, Beiras avogou por, a partir de aí, "emprender de novo o camiño cara o cumio", que para esta corrente é "a emancipación nacional e social do noso país".

Así, Beiras demandou que a participación do BNG no Executivo non leve a esta organización a que "a práctica no marco autonómico se convirta nunha práctica autonomista", porque isto conlevaría "contribuir ao contrario do que pretendiamos".

Recalcou que teñen pendente emprender "un labor de información, comunicación, diálogo e integración de todas as persoas que queiran acompañarnos neste proceso". Beiras destacou que para ser membro do Encontro Irmandiño non é necesario ser membro de BNG e confiou en que "sexamos moitos centos de compañeiros de dentro e fóra do BNG".